Gina-inagurahan na ang labing-una nga pole vault facility nga natukod sa paninguha sang two-time Olympian kag world no. 4 nga si Ernest John “EJ” Obiena.
Nahamtang ang pasilidad sa sulod sang 12,000-capacity track and field sa Marcos stadium sa Laoag City, Ilocos Norte.
Kahapon sang ginpatigayon ang ribbon-cutting ceremony sa pagpanguna ni Obiena kag Ilocos Norte Gov. Matthew Manotoc kag gintambungan sang student-athletes halin sa mga eskwelahan sa probinsya.
Gintukod ang facility para malab-ot ang World Athletics standards para sa palaabuton nga mga kumpetisyon sang Filipino athletes.
Magluwas diri, may palaabuton man nga pasilidad sa Tagum, Davao del Norte nga magabukas sa temprano nga bahin sang 2025.
Sa Disyembre 6-9, may yara sang pole vault coaching clinic kag seminar sa Marcos Stadium kag si Emerson nga amay ni EJ kag coach sang national team kag UST high school athletics team amo ang magapanguna sa sessions.
Handum ni Obiena nga maka-produce ang Pilipinas sang dugang nga homegrown pole vault talents nga maga-excel sa mga international competitions rason kun ngaa ginsuguran sini ang pagpatukod sini nga mga facility.
Si Obiena isa ka Asian record holder kag nagpang-apat sa Paris Olympics sini nga tuig.
Wala sini natapos ang 2024 season bangud sa back injury, apang nagalaum nga makabalik liwat sa masunod nga tuig matapos nga nagnubo na ini sa iya anay ikaduha nga pwesto sa world rankings.
Nagapang-apat siya subong sa ranking kasunod kanday Armand Duplantis sang Sweden, Sam Kendricks sang USA, kag Emmanouil Karalis sang Greece.
