Back-to-back nga gold medals ang nakuha sang World No. 2 kag Pinoy pole vaulter nga si Ernest John “EJ” Obiena sa Poland isa ka bulan antes ang Paris Olympics!
Nagpangibabaw si Obiena sa 10 ka mga atleta nga nagpasakop sa Memorial Czeslawa Cybulskiego sa Poznan matapos nalukso ang 5.87-metros tatlo ka adlaw matapos nadag-an man sini ang bulawan nga medalya sa Irena Szewinska Memorial sa Bydgoszcz sa amo man nga pungsod sa Europa.
Nangin perpekto ang pagsugod sang hampang sang tag-isa ka attempt lang ang nahimo ni Obiena kag na-clear ang 5.62m, 5.77m, kag 5.87m.
Tatlo naman ka sunod-sunod nga straight fouls ang iya nahimo sa 6.01m sang gintuyo sini nga gub-on kuntani ang iya Asian record nga 6.00m nga iya nalab-ot sang 2023.
Matandaan nga ang 5.97m clearance sini sa Bydgoszcz sang nagligad nga adlaw amo ang na-set nga pinakamataas nga iya nalukso subong nga tuig. Sa nagligad nga mga kumpetisyon, pila ka beses nga nabali ang iya pole kag nagpang-hulam lamang apang napadal-an ini sang bag-o sa bulig sang Philippine Athletics Track and Field Association (PATAFA).
Sunod nga magapasakop si Obiena sa Meeting de Paris nga isa ka leg sang Diamond League sa France sa Hulyo 7 antes sini dalayon nga i-todo ang preparasyon para sa Paris Summer Games.
