Buhi pa ang paglaum nga makabulsa sang medalya sa Paris Olympics 2024 ang pole vault star sang Pilipinas nga si Ernest John “EJ” Obiena!
Abante na ang 28-anyos nga World Number 2 sa medal round sa athletics matapos ini nakasulod sa Top 12 sang qualifiers nga ginpatigayon sa Stade de France kag nagtakop ‘las syete subong nga gab-i (oras sa Pilipinas).
Sa sini nga qualification round, gintunga sa duha ka grupo ang 31 ka mga atleta kun sa diin kinahanglan nila nga malapawan ang standard height nga 5.80m ukon magsulod sa top 12 para makadiretso sa finals.
Nangin makahalawat-hawat ang dalagan sang kumpetisyon antes nakabawi ang Pinoy pride kag na-clear ang 5.75-meters.
Una nga nag-pass si Obiena sa paglukso sa 5.40-meters kaupod ang world number one kag defending Olympic gold medalist nga si Armand Duplantis sang Sweden kag Emmanouil Karalis sang Greece.
Sunod nga gintinguhaan sini nga lapawan ang 5.60-meters sa masunod nga set apang napaslawan ini bangud na-igu sini ang bar; kag sa ikaduha naman nga attempt sa amo gihapon nga kataason, wala gihapon ini nagmadinalag-on bangud naigu naman sang iya lower limbs ang bar.
Wala na nagpadayon si Obiena sa third attempt kag natigayon ini nga makaluwas sa elimination sa masunod nga lukso sang na-clear sini ang 5.70 sa isa gid lamang ka attempt — butang nga gin-selebrar sini sa atubang sang linibo ka mga tawo paagi sa iya Spartan-like war cry.
Natalana ang medal round sa Agusto 6, 1:00 sa kaagahon oras sa Pilipinas. Tuyo sini nga malapawan ang 11th-place finish sini sa Tokyo Games 2020 nga ginpatigayon sang 2021.
Pananglitan makakuha sang medalya si Obiena, ini ang mangin una nga Olympic medal sang Pilipinas sa athletics halin sang 1936.
