Pagatutukan sang Filipino Olympian kag world no. 2 pole vault athlete nga si EJ Obiena ang outdoor season samtang nga ginahandaan man sini ang mangin performance sa Paris Olympics sa bulan sang Hulyo.
Ini matapos nga napaslawan nga makabulsa sang medalya kag nagpang-siyam lamang sa 11 ka mga pole vaulters sa bag-o lang nagtakop nga World Athletics Indoor Championships sa Glasgow, Scotland.
Nalukso sang 28-anyos nga Pinoy pride ang 5.65 meters kag nagtuyo pa kuntani nga ma-clear ang 5.85 meters kag 5.90 meters apang napaslawan rason sang iya nga early exit sa kumpetisyon.
Sa ginalauman, nagpanguna sa kumpetisyon ang world no. 1 nga Swedish-American pole vaulter nga si Armand ‘Mondo’ Duplantis nga nakalukso sang 6.05m; silver medalist si Sam Kendricks sang USA (5.90m); kag nagpangatlo si Emmanouil Karalis sang Greece (5.85m).
Sa pihak sini, nahangpan ni Obiena nga amo sini ang dalagan sang sports.
“Took my chances, but it did not work out. Clearing one bar in the whole competition and coming in 9th place. The reality of sports sometimes,” kabahin sang post sang Filipino athlete.
Kun matandaan, sang nagligad nga semana, sunod-sunod ang pagpangibabaw sang Filipino athlete matapos sini nakuha ang gold medal sa Memorial Josip Gasparac sa Croatia kag amo man sa ISTAF Indoor Berlin sa Germany kun sa diin ginguba pa sini ang Asian indoor record paagi sa 5.93m clearance.
