Ginpangabay ni Senate Finance Committee Chair Sen. JV Ejercito sa Kamara nga sa bicameral conference committee na lamang sulbaron ang mga isyu sa proposed national budget sa baylo nga bawion liwat ang bersyon sang lower chamber nga napasar na.
Kasunod ini sang panawagan sang pila ka miyembro sang Kamara, lakip ang Makabayan bloc, nga kuhaon kag usisaon liwat ang proposed budget matapos ideklarar sang Supreme Court nga supak sa Konstitusyon ang pila ka probisyon sa mga national budget para sa 2024, 2025 kag 2026.
Nagpaandam si Ejercito nga mahimo magresulta sa reenacted budget ang pagbawi sang proposed budget kun sa diin padayon nga gamiton ang nagligad nga budget bangud wala napasar kag napirmahan ang bag-o nga budget antes magsugod ang fiscal year.
Suno sa senador, may posibilidad nga madoble ang pondo para sa mga daan nga proyekto samtang wala naman sang pondo nga mahatag sa mga bag-o nga programa.
Ginpaathag man ni Ejercito ang iya kabalaka nga mahimo indi matapos ang pagpasar sang budget antes matapos ang tuig bangud sa hugot nga schedule sang Kongreso, lakip ang pagpadayon sang impeachment proceedings kag ang paghiwat sang ASEAN Summit.
Suno sa senador, mahimo nga sa bicameral conference committee na lang istoryahan kag ugyunan ang mga magkatuhay nga bersyon sang Kamara kag Senado.
Ginpasiguro niya nga mangin transparent ang proseso.
Natapos sang kahapon, Oktubre 22, ang mga hearing sang budget committee.
Ginapaabot nga isumiter subong nga Byernes ang mga report sang subcommittee, samtang magapakigsapol naman sa mga civil society organization sa Lunes antes sugudan ang plenary deliberations.
