Ginpasalig sang chairman sang Senate Committee on Finance nga buligan niya nga mapabakod pa ang implementasyon sang Universal Health Care Law sa pungsod paagi sa paghatag sini sang prayoridad sa ginaproponer nga 2027 national budget.
Sa interview sang Bombo Radyo kay Senator JV Ejercito nga principal author man sang amo nga layi, iya ginpahayag nga lakip sa iya iduso ang pagdugang sang pondo para sa Philippine Health Insurance Corporation ukon PhilHealth agud madugangan ang mga benepisyo kag mapaayo ang mga health package.
Iduso man sang senador ang dugang nga pondo para sa zero balance billing.
Ini agud mas madamo nga persons with disability, mga indigent ukon imol, kag senior citizens ang makabaton sang bulig medikal sa mga ospital sang Department of Health (DOH).
Dugang pa, itulod man ni Ejercito ang pagpaayo sang mga healthcare facilities.
Lakip diri ang Western Visayas Medical Center nga ginatan-aw nga mangin isa ka specialty center nga may mga pasilidad para sa heart, lung, kidney kag cancer treatment.
Suno kay Ejercito, kinahanglan man masolbar ang pagginutok sang mga pasyente sa amo nga ospital.
Bangud sini suno sa iya, kinahanglan nga mapauswag ukon mapaayo ang mga provincial kag district hospital agud makasarang man ini nga magpatigayon sang mga operasyon kag makahatag sang nagakaigo nga pagbulong sa mga pasyente, sa baylo nga magdamo ang pasyente sa mga apex hospital.
Una na nga ginpahayag ni Ejercito nga padayunon sini ang mga reporma nga ginsuguran ni Senate President Sherwin Gatchalian nga amo anay ang chairman sang Finance Committee. Lakip sa iya ginmensyonar amo ang transparency paagi sa hayag nga pagpakita sang budget kag deliberasyon sa publiko.
Sandig sa Department of Budget and Management (DBM), nakasentro sa tema nga “People-Centered Growth for an Inclusive and Resilient Future” ang ₱7.2-trillion proposal.
Ini ang may 6% increase halin sa 2026 national budget kag naga-account sang 21.7% sang Gross Domestic Product sang pungsod.#
