ILOILO – Nagapanguna sa may pinakamadamo nga sahi sang paglapas sa tawhanon nga kinamatarong Western Visayas amo ang ginaalegar nga extrajudicial killings.
Sa Good Morning Philippines program, ginpahayag ni Atty. Jonnie Dabuco, Director sang Commission on Human Rights 6, iya ginpahayag nga sang una, mas madamo ang kaso sang Violence Against Women and Children.
Suno kay Dabuco, yara sa 50 ang kaso sang alleged extrajudicial killings sa rehiyon nga ginasundan sang kaso may kaangtanan sa Violence Against Women, Children’s Rights violation kag tipikal nga mga panumbungon.
Ginpahayag ni Dabuco nga apisar nagdamo ang numero sang kaso sang alleged extrajudicial killings sa rehiyon, indi man ini makabig nga krisis apang mahulog lang sa kategorya nga alarming.
Suno naman kay Chris Montaño, Information officer 3 sang Commission on Human Rights 6, wala nagapabaya ang ahensya sa pagbulig sa mga biktima sang paglapas sa tawhanon nga kinamatarong.
Gin-ako ni Montaño nga madamo sang kaso nga indi masolbar bangud sa pila ka mga sirkumstansiya kaangay sang kakulang sang witness.
Sa subong suno kay Montaño, padayon ang ila kampanya agud mapahibalo sa publiko ang tuhoy sa pagpangapin sa kinamatarong.
Pila sa ginahimo nga tikang sang ahensya amo ang pagpakig-angot sa nagkalain-lain nga ahensya sang gobyerno, mga buluthuan kag mangin sa simbahan agud mapalapnag ang adbokasiya may kaangtanan sa Human Rights protection.
