Ginakabig sang isa ka ekonomista nga counterproductive ang hagna nga nga may katuyuan nga magpatuman sang P200 across the board wage hike sa private sector.
Sa hearing sang House Committee on Labor and Employment nga ginapangunahan ni Rizal 4th District Rep. Fidel Nograles, ginpasar sang house panel ang substitute bill para sa House Bill 514, 756, 7871 kag 10319 nga lunsay mga hagna agud magpatuman sang saka sa sweldo.
Sa interview sang Bombo Radyo kay Bonnie Ladrido, executive director sang Institute of Contemporary Economics, iya ginpahayag nga manami pamatian ang across the board wage hike, apang sa pagkamatuod, pila lang ang makapulos sini.
Paathag ni Ladrido, possible nga mag-angkon sang negatibo nga epekto ang taas-sa sweldo sa ekonomiya, bangud madamo sang magagmay nga mga negosyo sa Pilipinas nga mabudlayan nga ipatuman ang 200 pesos nga wage increase.
Kun ikonsiderar naman nga ang Pilipinas na ang may pinakamataas nga minimum wage sa Southeast Asia, posible man ini nga magpalayo na ang mga investors.
Apang suno sa natungdan, madugay pa ini nga proseso bangud kinahanglan pa nga may version diri ang Senado antes mapasar sa Kongreso ang hagna.
Dugang pa sini, mas maayo nga itugyan na lang sa Regional Wage Boards ang desisyon nga amo ang nagatiglawas sa gobyerno, employers kag mga mamumugon.
Santo sa P200 Daily Across-the-Board Wage Increase Act, tanan nga employers sa pribado nga sektor, agricultural man ukon indi, anuman kadako ang capitalization kag numero sang empleyado ang kinahanglan nga magbayad sang dugang nga P200 sa mga empleyado.
Nasaad sa hagna nga ang sin-o man nga indibidwal, korporasyon, trust, firm, partnership, association ukon entity nga magalapas ang mahimo multahan sang P50,000 tubtob P100,000 ukon pagkapreso sang duha tubtob apat ka tuig.
Ginamanduan man ang employer nga bayaran ang iya empleyado sang doble sang balor sang wala nabayaran nga benepisyo.
Ang Department of Labor and Employment ang magapanguna sa paghimo sang implementing rules and regulations sang layi.
