JORDAN, GUIMARAS – Ginatun-an pa sang Guimaras Provincial Government ang pagpatuman sang Level 3 Lockdown sa bug-os nga probinsya bilang pagpanghanda sa Coronavirus Disease 2019 (COVID-19).
Sa Good Morning Philippines program, ginpahayag ni Mayor Ruben Corpuz sang Jordan, Guimaras, nga sa tion nga ipatuman ang Level 3 Lockdown, indi na pagpahanugutan nga makaguwa sa balay ang mga pumuluyo sa sulod sang 14 ka adlaw.
Antes pa man ini ideklarar, ginpahayag ni Corpuz nga tun-an anay nila nga mga opisyal kun ano ang systema nga patigayunon agud nga indi maapektuhan ang food supply sa bug-os nga probinsya.
Sa subong, 70% ang nangin buhin sa eknomiya sang Guimaras bangud nga limitado ang negosyo.
Sa banwa sang Jordan, ginpahayag ni Corpuz nga gindula na ang market day, ginlimitahan ang market hours kag istrikto nga ginapatuman ang physical distancing kag ang pagsuksok sang facemask.
Ginadumili-an man ang angkas sa motorsiklo kag isa lang ang dapat nga sakay sang tricycle apang pahanugutan ang duha ka sakay kun naga-istar sa isa ka balay ang mga pasahero.
Sa depampasahero nga jeep naman, ginpahayag sang natungdan nga hugot nga ginapatuman ang physical distancing.
Para naman sa concerns, mahimo nga magpakig-angot sa Local Government Unit sang Jordan sa cellphone number nga 09171204877.
