𝗠𝗔𝗡𝗜𝗟𝗔 —Nakarekord ang ekonomiya sang Pilipinas sang mas madasig nga growth rate sa ikaduha nga quarter sang 2024 —nga nagamarka sang pinakamadasig nga pagsaka sa lima ka quarter— sa likod sang mabaskog nga mga consumption activities sa sulod sang amo nga period.
Suno kay Philippine Statistics Authority (PSA) chief nga si Claire Dennis Mapa, ang gross domestic product (GDP) sang pungsod —ang kabug-usan nga balor sang mga balaklon kag serbisyo nga ginhimo sa isa ka period— nagtubo sang 6.3% sa Abril tubtob Hunyo 2024 nga period.
Mas madasig ini sangsa gin-revise nga growth rate sang GDP nga 5.8% sa una nga quarter sang tuig.
Amo man ini ang pinakamadasig nga growth rate sang ekonomiya sang Pilipinas sa sulod sang lima ka quarter halin sang 6.4% nga growth rate nga nakita sa una nga quarter sang 2023.
Nahibaluan nga sa mga ekonomiya sa East Asian Countries nga nagpaguwa sang mga numero sa ikaduha nga kwarter, ang Pilipinas yara sa likod sang 6.9% sang Vietnam, kag mas mataas sa 5.8% sang Malaysia, 5.0% sang Indonesia, kag 4.7% sang China.
