ILOILO CITY – Yara sa steady trajectory ang ekonomiya sang Pilipinas sa pihak sang pagpanghangkat nga ginpangatubang sang pungsod subong nga 2019.
Sa Good Morning Philippines Program, ginpahayag ni Rey Emmanuel Echaveria, economic specialist, nga nagnubo ang inflation rate kag madamu ang mga proyekto nga ginapatuman.
Suno kay Echaveria, nagdamu man ang pamilya nga nakatibawas sa kapigaduhon apang kinahanglan nga mapabilin sang gobyerno nga manubo ang poverty rate kag ang inflation rate agud nga mapa-uswag ang ekonomiya.
Ginpahayag ni Echaveria nga isa man sa dapat tun-an amo ang mga ginapatuman nga programa kasubong sang modernization program nga may yara sang bentaha kag disbentaha.
Sa pihak sini, indi lamang ang mga problema sa pungsod ang nagaapekto sa ekonomiya kundi lakip man ang nagakatabo sa iban nga pungsod ilabi na sa patag sang trading kasubong sang economic war sa tunga sang Estados Unidos kag China lakip man ang Brexit ukon ang pagbulag sang United Kingdom sa European Union.
Wala man ini sang direkta nga epekto apang mahimo nga mangin colateral ang pungsod ilabi pa kun ang economic war ang nagakatabo sa ally country sang Pilipinas.
Sa 2020, ginpahayag ni Echaveria nga matapos na ang mga ongoing projects apang lauman man nga yara sa gihapon ang mga problema.
Agud nga mapasigurado nga estable ang ekonomiya sang pungsod, mas makapaayo nga may yara sang perfectionist government kag tutukan ang domestic trading.
Magluwas diri, ginpahayag sang natungdan nga indi man pagkalimtan ang pag-angkon sang business relations sa iban nga pungsod.
