ILOILO CITY- Kinahanglanon na suno kay Iloilo City Mayor Jerry Treñas nga buhion liwat ang ekonomiya sang syudad agud indi na mangin mabudlay para sa tanan ang sitwasyon bangud man sa nangin epekto sang coronavirus disease 2019.
Sa interview sang Bombo Radyo kay Mayor Treñas, iya ginpahayag nga apisar indi man gulpiyada nga makabalik sa kinaandan ang ekonomiya, ang importante amo nga may amat-amat nga sistema sa pagpanumbalik sini.
Suno kay Treñas, pagabalansehon niya ang tanan nga mga bagay agud indi na mangin mabudlay, kag indi mahimo nga magpabilin nalang sa kaangay sini nga sitwasyon ang syudad bangud may posibilidad nga indi na makasarang pa ang syudad nga masustiner ang pagpanghatag sang ayuda sa pumuluyo.
Lakip sa amo nga plano suno kay Treñas amo ang amat-amat nga pagbalik sang operasyon sang pila ka mga establisimento apang 50% lang sang mga empleyado ang pahanugutan nga magtrabaho, samtang sa bahin naman sang mga malls, 50% lang man sang mga pumuluyo ang mahimo nga makasulod.
Suno kay Treñas, limitado lang man ang salakyan nga mahimo magbyahe, bangud indi man mahimo nga ang tanan nga mga pumuluyo ang magginuwa sa ila balay kag magpadulong sa nagkalain-lain nga bahin sang syudad.
Ginpasigurado man sang alkalde nga tubtob sa matapos ang bulan sang Mayo, magapadayun ang pagpanghatag sang ayuda sa mga pumuluyo lakip na ang operasyon sang community kitche.
Sa pihak nga bahin, ginpahayag man ni Mayor Treñas nga pangitaan niya sang paagi nga mabalik man ang pagpatigayun sang santos nga misa.
Suno kay Treñas, ini na ang tion agud magpangamuyo sa Ginoo nga ubayan ang tanan kag kahatagan sang kaisog agud makalampuwas sa krisis nga ginapangatubang sa subong.
Pahayag pa sang alkalde, nagakadapat man nga magpangayo sang pag-ubay sa Ginoo agud indi na magmalasakit pa ang iban pa nga pumuluyo.
