ILOILO CITY— Ginpaathag sang isa ka eksperto sa layi kun ano ang Cybercrime Prevention 2012.
Ini ang kaangot sa pagpagwa sang subpoena sang National Bureau of Investigation (NBI) batok kay dismissed multi-awarded Chief of Police Charlie Sustento, bangud sa ginapahayag paghimo sang philpharm facebook account nga nagaguba kay Iloilo 4th district Cong. Ferjenel Biron.
Sa programa Dura Lex Sed Lex ginpahayag ni Atty. Joseph Celis, Regional Director sang National Police Commission (NAPOLCOM) Region 6, nga katuyuan sang nasambit nga layi amo nga maprotektahan ang mga netizens sa mga pagpang-abuso nga mahimo himuon pinaagi sa internet.
Sa idalom sang Chapter III section 4 sang layi, lakip sa cybercrime offences amo ang mga masunod; illegal access, illegal interception, data interference, system interference kag misuse of device.
Nasaad man diri ang mga hilikuton kaangay sang spamming, hacking kag identity theft.Pinaagi sa sini nga layi mahimo mapasakaan sang kaso ang sin-o man nga maghack sang website kag facebook account, amo man ang pagpalapta sang internet viruses.
Ang sin-o man nga madakpan nga nagahimo sang nasambit nga krimen ang mahimo mapreso sang 6-12 katuig kag magamulta sang indi magnubo sang P200,000 pesos.
May kinamatarung man suno sa Napolcom Regional Director nga makakuha sang iya abugado. Nagpanugyan man si Celis sa mga pulis nga naangot sa mga kaso nga bukas ang Napolcom sa pagpamati sa mga pulis kag paghatag sang bulig.
