Iloilo – Ginbalabagan sang grupo nga Paghugpong sang Mangunguma sa Panay kag Guimaras ang ginduso nga pagbutang kay presidential sister Senator Imee Marcos bilang masunod nga tiglikom sang Department of Agriculture.
Matandaan nga nagsuhestiyon ang farmers group nga Samahang Industriya ng Agrikultura nga i-designar bilang tiglikom ang presidential sister bangud nakita sang mga ini ang nangin panikasog sang senador agud mabuligan ang agriculture sector sa pungsod.
Sa interview sang Bombo Radyo kay Lucia Capaducio, Chairperson sang Paghugpong sang Mangunguma sa Panay kag Guimaras, iya ginpahayag nga mas nagakadapat nga ihatag ang posisyon sa mga eksperto sa panguma kag indi sa utod sang presidente.
Suno kay Capaducio, bangud sa lapnagon nga importasyon sa pungsod, madamo sang mga mangunguma ang apektado kun sa diin mas nagakinahanglan sang may ihibalo sa pagsolbar sang problema sang ekonomiya kag agrikultura.
Ginpahayag dugang sang natungdan nga kinahanglanon sa masunod nga tiglikom amo ang makasarang sa pagpauswag sang produksyon sang nanari sari nga pananom agud indi magsalig sa iban nga pungsod.
Nahibaluan nga nag-atubang sang madamo nga problema ang pungsod kadungan sang pagsaka sang presyo sang mga food items sa merkado kaangay sang bombay kag repolyo.
