ILOILO CITY- Eksperyensiya ang bentaha sang Pinoy boxer nga four-division world champion Donnie “Ahas” Nietes batok sa iya kasumpong nga si World Boxing Organization (WBO) world super flyweight king Kazuto Ioka sa ila away nga patigayunon sa Ota City General Gymnasium sa Tokyo, Japan subong nga gab-i.
Sa interview sang Bombo Radyo kay Edwin Espejo, isa ka boxing analyst, iya ginpahayag nga kun basehan ang record, si Nietes ang may yara sang 43 wins nga may 23 knockouts, 1 defeat kag 6 draws samtang si Ioka naman ang may yara pa lang sang 28 wins, 2 defeats kag 15 knockouts.
Apang suno kay Espejo, mangin disbentaha para kay Nietes ang iya edad nga 40 kun ipaanggid sa 33-anyos nga si Ioka apang gin-athag niya nga indi man ini garantiya para mas mangibabaw ang Japanese boxer.
Sa pihak sini, nagalaum si Espejo nga mas maganahan si Nietes nga pierdehun si Ioka agud itimalos ang kapaslawan ni Mark Magsayo sang damlag lang batok kay Rey Vargas sang Mexico nga nangin rason kun ngaa wala na subong sang ginauyatan nga world title ang Pilipinas sa labing una nga tion sa sulod sang masobra isa ka dekada.
