Liwat nga nagpangulintas sang medalya ang manghod ni two-time Olympic gold medalist Carlos Yulo nga si Eldrew Yulo sa gymnastics competition sa Hong Kong.
Walo ka gold medals ang nabulsa ni Eldrew sa junior division lakip na sa team all-around kag sa individual all-around, floor exercise, vault, parallel bars, horizontal bar, pommel horse, kag still rings.
Siya ang may pinakadamo nga nakuha nga medalya sa 25-medal haul sang Team Philippines sa Chiu Wai Chung Cup.
16-anyos pa lamang subong si Eldrew kag ginakabig na nga masunod nga great Filipino gymnastics prospect kasunod sa iya magulang.
Sang Mayo, matandaan nga nakuha man ni Eldrew ang junior vault gold sa Men’s Artistic Gymnastics Asian Championships sa Uzbekistan kag ginsundan pa sang apat gid ka bulawan nga medalya (individual all-around, floor exercise, vault, kag still rings) kag duha ka silvers (team all-around kag parallel bars) sa Artistic Gymnastics Stars Championships sa Thailand sang Nobyembre.
Ginalantaw man nga malakip na si Eldrew sa ipadala sang Pilipinas sa Los Angeles Olympics sa 2028 nga kun matabo magadungan kay Caloy nga nagaplano man nga makasulod sa iya ikatatlo na nga Olympiada.
