Nag-apelar sa Korte Suprema ang beterano nga election lawyer nga si Romulo Macalintal nga ideklarar nga unconstitutional ang layi nga nagasaylo sang December 2025 Barangay and Sangguniang Kabataan elections sa Nobyembre 2026.
Matandaan nga sang Mierkules, ginpirmahan ni President Ferdinand Marcos, Jr. ang Republic Act No. 12232 nga nagasaylo sang eleksyon sa una nga Lunes sang Nobyembre 2026 kag nagahimo man sang term of office sang tanan nga barangay and SK officials sa apat ka tuig.
Sa iya nga petition for certiorari and prohibition, ginpunto ni Macalintal nga ang RA 12232 wala nagmitlang sang tinaga nga “postponement”, kaangot sa 2023 Supreme Court decision sa Macalintal vs. Comelec, nga nagadeklarar nga unconstitutional ang pag- postpone sang Barangay and Sangguniang Kabataan elections nga wala sang balido nga rason.
Sa petisyon, ginhingyo ni Macalintal sa korte nga mag-isyu sang Temporary Restraining Order (TRO) ukon status quo ante order nga nagamando sa Office of the President nga untaton ang pagpatuman sang layi.
Suno kay Macalintal, possible nga pulitika ang rason sa likod sang postponement sang December 2025 polls.
