Magasugod na buwas nga adlaw, Enero 12, 2025 ang election period para sa May 2025 midterm elections.
Sa interview sang Bombo Radyo kay Atty. Wil Arceño, Asst. Regional Director sang Commission on Elections Region 6, iya ginpahayag nga sa pagsugod sang election period magasugod man ang intensified nga check points sa pila ka mga dalan, pantalan, paluparan, kag mga terminal.
Suno kay Arceño, opisyal man nga magasugod ang estrikto nga pagpatuman sang gun ban sa Western Visayas.
Ginpahayag man sini nga sa idalom sang gun ban, istrikto nga ginadumilian ang pagdala ukon pagbyahe sang armas kag iban pa nga makamamatay nga bagay kaangay sang patalom magluwas lang kun otorisado ini.
Gintumod man ni Arceño nga makabig nga election offense ang paglapas sa gun ban kag may daku nga penalidad kaangay sang pagka-preso, permanent disqualification sa pagpungko sa public office, kag pagkadula sang kinamatarong sa pagboto.
Nahibaluan nga bilang general rule, ang bona fide police, military, kag myembro sang government law enforcement agencies nga may complete uniform kag yara sa official duty ang indi sakop sang election gun ban sa bug-os nga election period.
