CONCEPCION,ILOILO– Gin-dismiss sang Regional Trial Court – Branch 66 sa Barotac Viejo, Iloilo ang election protest nga ginpasaka batok kay Concepcion, Iloilo Mayor Raul Banias.
Sa interview sang Bombo Radyo Iloilo kay Mayor Banias, iya ginpahayag nga sa resolution nga ginpagwa ni Judge Oscar Leo Billena, nasaad nga ‘insufficient in form and substance’ ang protest nga gin-file sang napierde nga kasumpong ni Banias sa pagka-alkalde sang May 13 midterm elections nga si Rainier Balida.
Suno kay Banias, nagapamatuod lamang ini nga wala sang basehan ang alegasyon ni Balida nga may anomaliya sa isipay sang boto bangud napaslawan si Balida nga i-detalye ang electoral fraud ukon iregularidad sa protested precincts nga amo ang ginarequire sa 2010 Rules of Procedures in Election Contests Involving Elected Municipal Officials.
Nahibaluan nga sa election protest ni Balida nga myembro sang Nacionalista Party batok kay Banias nga yara sa idalom sang Partido Demokratiko Pilipino – Lakas ng Bayan 9PDP-Laban) , iya gin-alegar nga wala maisip ang 1,517 ka mga boto para sa pagka- mayor rason nga naghingyo ini sang manual recount sa 43 ka clustered precincts sa Concepcion.
Magluwas diri, gintumod man ni Balida ang pag- malfunction sang pila ka vote-counting machines (VCM).
Matandaan nga tatlo ang nagpapili sa pagka-mayor sa Concepcion nga ginalakipan nanday Banias nga nakakuha sang 10,106 ka boto, Balida nga nakakuha sang 9,862 ka boto, kag independent candidate nga si Butch Ariola nga nakakuha sang 166 ka boto.
