ILOILO CITY- Plastado na ang Parish Pastoral Council for Responsible Voting (PPCRV) agud tungdan ang papel sini bilang election watchdog sa May 9 national and local elections.
Sa interview sang Bombo Radyo kay Msgr. Meliton Oso, director sang Jaro Archdiocesan Social Action Center (JASAC) kag coordinator sang PPCRV, iya ginpahayag nga may yara tanan sang 6,000 volunteers ang bug-os nga Archdiocese of Jaro para magbantay sa dalagan sang piniliay sa Iloilo kag Guimaras.
Suno kay Msgr. Oso, samtang nagahilapit ang eleksyon, masako man ang PPCRV sa pagpatigayon sang voters education campaign.
Sa adlaw naman sang eleksyon, magapahamtang ang pastoral council sang mga poll watchers sa mga polling place apang gin-ako ni Oso nga indi tanan ang ila masakop.
Pahayag ni Oso, siguraduhon man sang PPCRV bilang citizen arm sang Commission on Elections (COMELEC) kag accredited organization nga magkuha sang results files sang eleksyon, nga makakuha sang kopya sang election returns (ER) agud ipadala sa transparency server nga nakabase sa University of Santo Tomas.
Bangud indi tanan nga polling place ang mabutangan sang poll watcher sang PPCRV, nakig-angkot na ini sa mga Municipal Election Officers nga amo ang magapadala sang mga election returns.
