ILOILO CITY- Amat-amat na nga mabatyagan sang mga konsumidor sang Iloilo Electric Cooperative (ILECO) II ang epekto sang padayon nga pagtaas sang presyo sang produktong petrolyo.
Sa interview sang Bombo Radyo kay Engr. Jose Redmond Roquios, general manager sang Iloilo Electric Cooperative (ILECO) II, iya ginpahayag nga nagataas ang ila generation cost bangud 50% sang ila gina-source out nga power supply ang nagahalin sa coal plant.
Suno kay Roquios, epekto ini sang pagmahal man sang presyo sang gina-import nga coal nga ginagamit sang mga planta nga naglab-ot na sa 400 dollars per metric ton.
Pahayag ni Roquios, bangud sini, posible nga sa bulan sang Abril, madugangan sang 50 centavos tubtob 1 pesos per kilowatt hour ang electric bill sang mga konsumidor.
Gin-athag naman sang natungdan nga magluwas sa generation cost, wala na sang iban nga adjustment nga makaapekto sa balayran sang mga konsumidor sang ILECO II.
