ILOILO CITY- Kagutom kag kautangan- ini ang nagapabudlay sa sitwasyon sang masobra 15 ka mga electricians bangud wala sa gihapon maswelduhan sang halos duha ka bulan sang ila nga kontraktor nga 13th CBC ukon Connectivity Builders Corporation.
Sa interview sang Bombo Radyo kay Ronel Binibini,tumandok sang Roxas City, Capiz kag isa sa mga electricians nga nagatrabaho sa ginatukod nga condominium sa Megaworld Mandurriao, Iloilo City, iya ginpahayag nga manug-siyam na ka semana nga wala mahatag ang ila sweldo.
Suno kay Binibini, ang ginpalab-ot sa ila nga impormasyon sang ila Human Resource Officer nga si certain Jaryn amo nga ginhold sang Megaworld main office ang billing gani wala pa ini mahatag sa kontraktor.
Magluwas diri, wala na sang iban nga impormasyon nga ginhatag sa ila bangud wala man nagapakita ang ila project engineer nga si
Engr. Gelo Quilantang.
Sa subong suno sa natungdan, wala na sila sang kuhaan sang ibakal sang pagkaon sa adlaw-adlaw, inugbayad sa ila boardinghouse, kag inugpadala sa ila pamilya kag pila na ka Sabado nga ginpromisa nga swelduhan sila apang wala ini gihapon nagatupa.
Subong nga hapon, nagpadulong sa Department of Labor and Employment(DOLE) ang mga tagreklamo amo man ang tiglawas sang kontraktor agud mahitso ang problema sa ila sweldo.
