ILOILO – Indi lamang kasadya kag lingaw ang dala sang Electronic Sports ukon video games competition.
Ini ang napamatud-an sang 19 anyos nga Ilonggo nga si Justine Banusing sang Pavia, Iloilo kag second year college student sa Estados Unidos.
Sa interview sang Bombo Radyo kay Banusing, iya ginpahayag nga ang Electronic Sports ang nangin palaagyan kun nga-a sa Estados Unidos siya nagpadayon sang pagtuon sa kolehiyo.
Suno kay Banusing, iya gid nga ginaduso ang pagpasangkad sang Electronic Sports nga para sa iban, para lamang sa lingaw-lingaw ilabi na subong nga naga moderno na ang teknolohiya.
Ginpahayag ni Banusing nga ang Electronic Sports ang mahimo man nga makabulig bilang palangabuhi-an paagi sa competitive video playing.
Ginpaanggid man sang natungdan sa isa ka pelikula ukon programa sa radyo ang Electronic Sports bangud nga indi matigayon ang isa ka programa kun wala sang mga tawo nga yara sa likod sini.
Bag-o pa man siya nakapadulong sa Estados Unidos, ginpahayag sang natungdan nga indi naman bag-o sa iya ang Electronic Sports Organizing sa local, regional ukon national level.
Ginbali man niya ang pagpati sang kadam-an nga ang Electronic Sports ukon paghampang sang video games ang wala sang may idulot nga maayo.
