Na-monitor sang Philippine Institute of Volcanology and Seismology (Phivolcs) ang elevated volcanic sulfur dioxide (SO2) gas emission halin sa Mt. Kanlaon lima ka adlaw matapos ang paglupok sini nga bulkan.
Sa statement sang ahensya, nakasaad nga ang gas emission halin sa crater ang bulkan ang naga-average sang 4,397 tons kada adlaw.
Amo ini ang pinakamataas nga emission subong nga tuig nga ginatakos sang campaign survey kag ikaduha nga pinakamataas nga land-based measurement para sa Kanlaon.
Suno pa sa ahensya, samtang wala pa nagakalma ang bulkan kag mat yara gihapon sang magmatic processes, posible ini nga magresulta sa explosive eruptions sa summit crater.
Nagapabilin gihapon ang status sang bulkan sa Alert Level 2; buot silingon, indi pa pwede nga magkadto ang mga tawo sa four kilometer-radius Permanent Danger Zone (PDZ) agud nga makalikaw sa volcanic hazards kaangay sang “pyroclastic density currents, ballistic projectiles, rockfall, kag iban pa.
Hugot man nga gina-dumilian ang paglabay sang aircraft malapit sa bulkan.
Gina-abisuhan man ang publiko nga tabunan ang ilong kag baba sang basa kag malimpyo nga tela ukon dust mask pananglitan may ma-monitor na naman nga ashfall.
Ginapaandaman man ang mga residente nga nagapuyo malapit sa mga suba sa southern kag western slopes nga posible gihapon ang pag-ilig sang lahar ilabi na kun naga-ulan sa Negros.
(Photo: AFP / Ferdinand Edralin)
