Indi isa ka long term solution para sa No to PUV Phaseout Coalition Panay, ang pagpasaka sang pamasahe sa mga pambuliko nga salakyan sa problema sang pungsod sa nagapadayun nga pagsaka sang presyo sang gatong.
Sa interview sang Bombo Radyo kay Elmer Forro, Lead convenor sang nasambit nga grupo, iya ginpahayag nga ila gid nga ginakilala ang pagpasaka sang pamasahe sa mga Public Utility Vehicles bangud ini amo ang labing apektado sa krisis, apang indi ini isa ka bastante ka solusyon.
Suno kay Forro, pagsuspende sang excise tax kag E-vat ang pinaka mangin epektibo nga solusyon agud nga mas mahagan-hagan ang epekto sang pagtaas sang presyo sang produktong petrolyo sa publiko.
Dugang pa sang natungdan, may ara pa sang reserba nga langis ang pungsod nga insakto para sa duha ka bulan, rason nga dapat ibalik ang presyo sang gatong sa daan sini nga presyo bangud nga wala pa nagbakal ang Pilipinas sang mga produktong petrolyo umpisa sang nagsugod ang kinagamo sa Middle East.
