ILOILO CITY- Magabulig ang Environmental Management Bureau Region 6 sa Iloilo City Government sa pag-comply sa RA 9003 ukon Solid Waste Management Act.
Sa interview sang Bombo Radyo kay Vic Los Bañes, Chief sang Solid Waste Management sang Environmental Management Bureau Region 6, iya ginpahayag nga may yara na sang Memorandum of Agreement sa tunga sang ahensya kag sang syudad kag ginahulat nalang nga pirmahan ini ni Iloilo City Mayor Jerry Treñas.
Suno kay Los Bañes, ang nasambit nga bulig ang may pondo nga 1.8 million pesos para sa pagpatindog sang Material Recovery Facility kag shredder machine.
Ginpahayag ni Los Bañes nga i-cluster ang tukuron nga Material Recovery Facility kag shredder machine nga ipahamtang sa tatlo ka mga merkado publiko sa syudad.
Gindugang pa sang natungdan, magluwas sa Material Recovery Facility kag shredder machines, may igadugang man nga plastic recycling facility nga nagabalor P6 million para sa syudad apang ini ang ginapaidalom pa sa deliberasyon.
Maga-provide man sang training ang Environmental Management Bureau sa mga pumuluyo tuhoy sa implementasyon sang Solid Waste Management Act.
Gin-athag naman ni Los Bañes nga madugay na sila nagahatag sang pondo sa mga Local Government Units kag mga barangay para sa implementasyon sang Solid Waste Management Act apang ginapulitika lamang ini gani indi ma-liquidate ang pondo nga ila ginahatag bangud may nagakontra nga mga pulitiko.
Suno naman kay Iloilo City Councilor Ely Estante, Chairman sang Committee on Environment sa konseho, iya ginpahayag nga ang nasambit nga Material Recovery Facility ang ipahamtang sa Iloilo Terminal Market, Central Market, kag Jaro Big Market.
Apang sa baylo nga magtukod sang bag-o, i-improve nalang ang Material Recovery Facility sa tatlo ka mga merkado.
Ang tagsa sk merkado ang painan sang 600,000 para sa improvement sang istruktura kag pagbakal sang shredder machine.
Ang Material Recovery Facility sang Iloilo Terminal Market ang magasakop sa barangay Rizal Palapala 1 kag 2, San Jose, Rizal Estanzuela, Gloria, Flores kag Rima-Rizal.
Ang Material Recovery Facility sang Central Market ang magasakop sang barangay Nonoy, Arsenal- Aduana,Rizal, Maria Clara,Kauswagan,Roxas Village, kag Ortiz.
Samtang ang Material Recovery Facility sa Jaro Big Market ang magasakop naman sang El 98, Desamparados, Seminario, Taytay Zone 2, Calubihan, Luna, San Vicente kag SM Hypermart.
Sa tion nga matigayon na, ini ang i- imonitor sang Environmental Management Bureau kag may penalidad man para sa violation.
