ILOILO CITY – Nakahanda na ang Philippine Embassy sa Kuwait sa patigayunon nga overseas absentee voting sa Abril 10 tubtob sa Mayo 9.
Suno kay Bombo International Correspondent Oliver Tupas Diong, Chairman sang Coalition of Filipino Community Organization in Kuwait, iya ginpahayag nga kahapon, nagpatigayon na sang dry-run sa mga nag-abot nga vote-counting machines (VCM).
Sa ginpatigayon nga dry run, nagsanto ang resulta sang election.
Suno kay Diong, ang election ang magasugod las-otso sa aga tubtob las-tres sa hapon. Sa pagboto, kinahanglan nga magdala sang ID ukon passport.
Ginpasiguro naman sang embahada nga masunod sa gihapon ang minimum health protocols sa pagboto.
Sa Kuwait, masobra sa 100, 000 ang mga Pilipino ang rehistrado sa kabug-usan nga masobra 200, 000 nga mga Pilipino sa amo nga pungsod.
Target sang embahada nga makaboto ang 40-50% sang numero sang registered voters.
Agud indi mabudlayan ang OFW sa Kuwait, may yara sang gin-provide nga libre nga salakyan padulong sa Block 1, Salwa Area kun sa diin nahamtang ang Philippine Embassy sa Kuwait.
