Indi dapat pagdagdagan sang penalidad ang mga empleyado nga indi makasulod sa trabaho bangud sa baha ukon malain nga panahon.
Ini ang nakabutang sa Labor Advisory No. 14, Series of 2026 nga ginpaguwa sang Department of Labor and Employment ukon DOLE. Ginpirmahan ni Labor Secretary Francis Tolentino ang amo nga advisory.
Ini ang updated guidelines kaangot sa pagsuspinde sang trabaho sa pribado nga sektor kun may mabaskog nga ulan, kun may pagbaha, kag kun may iban pa nga emerhensya.
Suno sa ahensya, wala dapat sang administrative sanction sa mga trabahador sa pribado nga sektor nga indi makasulod sa trabaho bangud sa delikado nga kondisyon sang panahon.
Sa idalom sang amo nga abiso, gin-engganyo sang DOLE ang mga pribado nga kompanya nga magsuspinde sang trabaho kon kinahanglan, bilang kabahin sang ila management prerogative kag sa koordinasyon sa mga safety officer, agod masiguro ang kaayuhan kag kaluwasan sang mga empleyado.
Kaangot naman sa sweldo, ginpaathag sang DOLE nga nagapadayon ang “no work, no pay” nga patakaran kon suspindihon ang trabaho.
Apang mahimo gihapon makabaton sang sweldo ang mga trabahador kon may mas paborable nga polisa ang kompanya, may collective bargaining agreement, ukon kun gamiton nila ang ila natipon nga leave credits.
Para sa mga empleyado nga nakasulod gihapon sa trabaho bisan malain ang panahon, suno sa DOLE, ang mga nakatrabaho sang sobra sa anum ka oras may kinamatarong sa full regular daily wage.
Ang mga nakatrabaho naman sing wala nagalampas sa anum ka oras makabaton sang katumbas nga bahin sang ila regular nga sweldo.
Gina-engganyo sang DOLE ang mga employer kag workplace safety committee sa bilog nga pungsod nga magpatuman sang klaro nga mga protocol kon malain ang panahon, agod maprotektahan ang mga trabahador batok sa mga peligro sa trabaho kag mapreserbar ang ila mga kinamatarong.
