ILOILO CITY- Nanindugan ang empleyado sang Iloilo City Veterinarian Office nga indi pamulitika ang rason sang ila reklamo may kaangtanan sa 21-month deficit sa salary increase nga ginamando sang Salary Standardization Law.
Sa interview sang Bombo Radyo kay Mr. Andrew Durano, iya ginpayahag nga wala ini sang iban nga tinutuyo kundi ang iduso nga mabaton sang mga empleyado kun ano ang para sa ila.
Suno kay Durano, madamo nga empleyado sa city hall ang nagasuporta sa iya apang nahadlok lang ang mga ini nga malisyahan nga nagapamulitika.
Pahayag niya, nagalibog ang iya ulo kun ngaa wala ini napa-inan sang pondo kag mahatag sa mga empleyado bisan pa padayon man nga naga-hire ang syudad sang mga empleyado kag nagahimo pa sang bag-o nga department.
Ginsuhestyun man sini nga kun mahimo ilakip sa 2025 budget ang salary increase differentials sang mga empleyado agud nga makuha nila ini sa Enero sa masunod nga tuig.
Ginabanta naman nga yara sa P50 million ang kinahanglan nga pondo para mahatag ang 21-month differentials sa salary increase sang mga empleyado.
Nagapati naman ini nga sala lang ang paghangop ni Mayor Jerry Treñas sa iya pahayag kag nanindugan nga indi pulitika ang sa likod sini bangud ginarespeto niya ang alcalde.
Matandaan nga ginpahayag ni Treñas nga mahatag lang ang salary increase sa idalom sang Salary Standardization Law sa tion nga maamyendaran ang Local Government Code kag kag himuon nga retroactive ang implementasyon sini agud mabaton sang masobra 2,000 ka empleyado sa Iloilo City hall ang 21 ka bulan nga salary increase back pay.
Ginhangkat man sini si Durano nga magpadalagan na lang sa pagka-alkalde agud debatehan nila ang amo nga isyu.
