Nagresulta sa minilyon nga kompensasyon ang pagpahalin sa trabaho sa isa ka lalaki sa Spain matapos gin-alegar nga nagainom ini sang beer samtang yara sa trabaho.
Ang lalaki, nga wala ginhingadlan, nagatrabaho sa isa ka electrical installation company.
Suno sa imbestigasyon, duda ang iya employer sa iya aktibidad gani nag-hire sila sang private detective agud panilagan ini.
Suno sa report sang detective, nakita ang lalaki nga nagainom sang beer sa mga bar kag parking lot samtang oras sang trabaho.
Sa isa ka insidente, gin-alegar nga naka-inom siya sang tatlo ka litro sang beer samtang lunch break.
Ang resulta, ginpahalin siya sa trabaho.
Apang gin-kwestyon sang lalaki ang iya dismissal kag nagpasaka sang kaso batok sa iya employer.
Sa desisyon sang High Court of Justice of Murcia, ginpaboran sang korte ang lalaki kag gindeklara nga unfair ang pagsipa sa iya sa trabaho.
Suno sa korte, bisan indi husto ang pag-inom sang lalaki, sobra ang sanction nga dismissal.
Gin-isa-isa man sang korte nga ang lunch break indi technically kabahin sang working hours kag wala man sang nagakaigo nga ebidensiya nga naapektuhan sang iya pag-inom ang iya trabaho.
Sa idalom man sang Spanish law, indi basta-basta pwede nga pahalinon ang empleyado bangod sa occasional drunkenness, kundi kinahanglan mapamatud-an nga habitual ukon masami ang iya pag-inom.
Gani, ginpapili sang korte ang kompanya: ibalik sa trabaho ang lalaki ukon bayaran siya sang 47,000 euros, ukon kapin P3.2 milyon nga compensation.
