Nagpositibo sa COVID-19 ang bug-os nga pamilya sang isa ka Iloilo City Hall employee sa Bo. Obrero, Lapuz, Iloilo City.
Sa interview sang Bombo Radyo kay Punong Barangay Ricardo Diรฑo Jr. sang nasambit nga lugar, iya ginpahayag nga una na nagpositibo sa virus ang empleyado sang Iloilo City Hall nga amo ang amay sang pamilya.
Didto kag ginpaidalom man sa swab test ang duha ka anak kag asawa sang empleyado sa diin nagwa nga nagpositibo man ang mga ini sa COVID-19.
Nagsaka naman sa 12 ang mga natumod nga close contact sang empleyado nga lunsay ginpaidalom sa swab test kag istrikto nga ginquarantine.
Suno kay Diรฑo, sa subong ginpaidalom na sa surgical lockdown ang compound sang balay sang empleyado nga COVID-19 positive.
Dugang pa sang opisyal, padayon naman nila nga ginamonitor ang pamilya nga nagpositibo sa virus.
Samtang, nagpositibo man sa COVID-19 ang tanan nga kaupdanan sa balay sang isa ka negosyante nga una na nalatnan sang virus sa Democracia, Jaro, Iloilo City.
Sa interview sang Bombo Radyo kay Punong Barangay Rex Jalbuena sang nasambit nga lugar, iya ginpahayag nga masami nga nagapakadto pabalik ang negosyante bangud sa iya negosyo sa syudad sang Iloilo.
Suno kay Jalbuena, sang nakabatyag ang negosyante sang sintomas sang COVID-19, didto kag nagdesisyon siya nga magpaidalom sa swab test kag nagpositibo ang iya resulta.
Ginswab test man ang tatlo pa niya ka kaupdanan sa sulod sang balay sa diin nagwa nga nagpositibo man ang mga ini sa nasambit nga virus.
Sa subong, istrikto nga nakahome quarantine ang negosyante lakip na ang tatlo pa ka myembro sang iya balay.
