πππ’πππ’ πππ§π¬βNaglab-ot sa P1.3 million ang balor sang kwarta nga nakuha sang mga suspetsado nga nang-ransak sang Iloilo Supermart sa Barangay Tabuc Suba, Jaro, Iloilo City.
Sa interview sang Bombo Radyo kay Police Major Eduardo Siacon, hepe sang Jaro Police Station, iya ginpahayag nga tatlo na ka semana ang nagligad sang may nabatian nga nagapangtiltig malapit sa lugar apang ginpabay-an lamang sang mga empleyado bangud wala man sila may makita nga naga-ubra nga construction workers sa saguwa sang store.
Suno kay Siacon, nadiskubrihan man sang empleyado sang mall nga may kinutkutan nga buho nga nahamtang sa daan nga entrance, kon sa diin, may kalabaon ang tunnel nga walo tubton pulo ka metros.
Ginalantaw man sini nga ang buho ang posible nga gingamit man sang mga suspetsado bilang alagyan agud nga makasulod sa nasambit nga store.
Ginabulubanta naman nga kaagahon natabo ang insidente, kon sa diin, nag-agi sa drainage ang mga nagpangransak lapos sa ginbuhuan nila nga semento.
Na-recover naman ang tatlo ka mga bara de cabra, lagari sang salsalon kag styro box sa drainage kun sa diin nag-agi ang mga suspetsado.
Sa subong, padayon sa gihapon ang pag-imbestigar sang kapulisan sa pag-ransak sa nasambit nga establisyemento apang, wala man ginadula ang posibilidad nga inside job ang natabo.
