ILOILO CITY – Nagahulat na gid lamang ang Mandurriao Police Station sa pamilya sang biktima agud nga mapasaka na ang kaso batuk sa empleyado sang isa ka bar nga naglampos sa lalaki nga na-ulamid sa kinagamo.
Ang biktima nga ginbawian sang kabuhi amo si Marshall Robles, 26, residente sang Barangay Lopez Jaena, Jaro, Iloilo City.
Sa interview sang Bombo Radyo kay Police Captain Benjie Dicen, deputy commander sang Mandurriao Police Station, iya ginpahayag nga may pangalan na sila sang empleyado sang bar nga amo ang naglampos sa biktima.
Natapos na sang imbestigador ang case folder apang ginhulam sang pamilya sang biktima agud nga matun-an sang ila nga pribado nga abogado.
Suno pa kay Dicen, desidido ang pamilya sang biktima nga magpasaka sang kaso.
Kun balik-balikan, may natabo nga kinagamo sa tunga sang duha ka grupo sang kalalakinhan sa gwa mismo sang bar.
Nagtambag ang security guard sang bar kag ang suspek.
Wala nagpamati ang mga na-ulamid sa kinagamo gani, nagkuha sang matig-a nga bagay ang suspek kag ginlampusan ang nalikod nga bahin sang ulo sang biktima.
Gindala pa sa ospital ang biktima apang makaligad ang anum ka adlaw, ginbawi-an ini sang kabuhi.
