ILOILO CITY- Aprubado na sa Sangguniang Panlalawigan ang resolusyon sang Association of Iloilo Provincial Government Employees (AIPGE) nga nagahingyo sa provincial board nga magpasar sang resolusyon nga naga-engganyo sa Philippine Congress nga magpasar sang layi nga magapataas sang Personnel Economic Relief Allowance (PERA) sang mga government workers.
Sa interview sang Bombo Radyo kay Joecil Mayor, presidente sang asosasyon, iya ginpahayag nga katuyuan sang amo nga tikang nga mapahagan-hagan ang impact sang nagapadayon nga pagtaas sang presyo sang gatong kag amo man ang presyo sang basic commodities bangud sa away sa tunga sang Russia kag Ukraine.
Suno kay Mayor, sa subong, ang mga government workers nagabaton lang sang bulanan nga PERA nga P2,000 santo man sa ginamando sa idalom sang DBM Circular No. 2009-3 nga napetsahan Agusto 18, 2009.
Sa amo nga resolusyon, ila ginplastar nga ang P2,000 nga PERA ang tuman ka gamay agud mapasanyog ang kalidad sang kabuhi sang government workers gani kinahanglan nga i- address ang ila financial needs agud mahatagan sang motibasyon ang mga empleyado nga mas mangin produktibo sa ila trabaho.
