“𝘐 𝘤𝘢𝘯 𝘯𝘦𝘷𝘦𝘳 𝘴𝘦𝘦 𝘮𝘺𝘴𝘦𝘭𝘧 𝘯𝘰𝘵 𝘸𝘪𝘵𝘩 𝘵𝘩𝘰𝘴𝘦 𝘵𝘸𝘰 𝘨𝘶𝘺𝘴,” direkta nga sabat sang Warriors superstar nga si Steph Curry nga nagatumod kanday Draymond Green kag Klay Thompson.
Ini kasunod sang ila 118-94 nga kalutusan sa kamot sang Sacramento Kings sa Western Conference play-in tournament nga nagakahulugan man nga nahulog na ang team sa NBA playoff contention.
Apisar may nabilin pa sa kontrata nanday Green kag Curry, indi naman klaro kun ano ang masunod kay Thompson bangud free agent na ini sa offseason kag POSIBLE nga makahampang sa iban nga team sa labing-una nga tion sa iya karera sa NBA.
Nagsugod nga mangin teammates ang tatlo sang 2012-13 season nga amo man ang tion nga nagsulod si Green sa liga bilang second-round pick.
Sang 2012-2023, ang Warriors ang nakahimo sang siyam ka appearances sa playoffs sa 11 ka seasons.
Lima man ang ila sunod-sunod nga NBA Finals appearances halin sang 2014 tubtub 2019, kag anum ang Finals appearances sa walo ka tuig nga stretch halin sang 2014 tubtub 2022 kun sa diin apat ang ila nadag-an.
Ang Warriors man ang ginakabig halos pinakamalapit sa dinastiya sa liga kasunod sang three-peat sang Los Angeles sang late 1990s kag early 2000s.
Ang tatlo nga constants sa sini nga kadalag-an amo sanday Curry, Thompson kag Green.#
