Liwat nga nagpatigayon ang Russia sang pagpang-atake sa energy infrastructure sang Ukraine rason nga napilitan ang pungsod nga magpatigayon sang emergency power outages.
Wala pa ginklaro sang Ukrainian energy minister kun ano kalapad ang gin-atake sang Russia apang may mga opisyal sa Ivano-Frankivsk nga nagsiling nga ini ang “worst attack” sa ila nga rehiyon.
Gin-abisuhan man ang mga tawo nga indi anay magguwa sa ila nga mga balay.
Suno sa Ukrenergo nga amo ang energy grid operator, na-damage ang power facilities sa madamo nga rehiyon rason nga gin-utod anay ang suplay sang kuryente.
Ini na ang pang-12 nga daku nga atake sang Russia sa power system sang Ukraine subong nga 2024.
Suno sa Moscow, ang ila atake amo ang balos sa Ukrainian strike sa military airbase sa south-west Russia nga gingamitan sang US-made missiles.
Kahapon, halos wala sang tawo sa mga dalanon sa Kyiv nga kapital sang Ukraine matapos nagpaandam ang air force nga posible iguon sang ballistic kag air missiles ang pila ka parte sang pungsod.
Sang nagligad nga bulan, matandaan nga nagpaandam si Russian President Vladimir Putin nga iguon sini liwat ang Ukraine gamit ang bag-o nga nuclear-capable ballistic missile.
