TORONTO, CANADA – Magapatigayon sang enggrande nga parada ang Toronto Raptors kasunod sang maragtason nga pagdaug sang team sa 2019 National Basketball Association (NBA) finals.
Sa interview sang Bombo Radyo kay Bombo International Correspondent Bryan Flores, Overseas Filipino Worker (OFW) sa Canada, iya ginpahayag nga sa Martes, adlaw sa Pilipinas, magapatigayon sang parada ang Raptors bilang pagpasalamat sa ila kadalag-an.
Bangud sini, ginpahayag ni Flores nga ginahandaan na sang Canadian Government ang patigayunon nga aktibidad sa diin ginalauman ang pagdagsa sang fans sa Downtown Toronto.
Ginpahayag sang natungdan nga kasubong nga nag-wild ang mga fans sang mahibalu-an ang resulta sang game 6 bangud nga ini ang labing una nga kahigayunan nga nakuka sang team ang kampeyonato sa NBA finals.
Sa pihak sang kadalag-an, ginpahayag ni Flores nga nagakasubo man ang mga Canadians bangud nga naka-angkon sang injury ang mga star players sang Golden State Warriors nga sanday Kevin Durant kag Klay Thompson nga amo ang nagapamuntos sa team.
Sang ginpaguwa na sa hampang si Thompson, maathag na suno kay Flores ang kadalag-an para sa Raptors.
Nahibalu-an nga nagtapos ang game 6 sa score nga 114-110 pabor sa Raptors sa diin si Kawhi Leonard ang ginpasidunggan nga Most Valuable Player (MVP).
