𝗝𝗔𝗥𝗢, 𝗜𝗟𝗢𝗜𝗟𝗢 𝗖𝗜𝗧𝗬 — Ginadudahan sang engineer sang Champion Builders nga isa man ka foreman ang nagpatay sa isa ka tigulang nga lalaki sa sulod sang barracks sa Brgy. Benedicto, Jaro, Iloilo City.
Ang biktima amo si Froilan Bernas, 63-anyos, residente sang Brgy. Sooc, Arevalo kag nagatrabaho bilang foreman sa gina-construct nga multipurpose building sa barangay.
Sa interview sang Bombo Radyo kay Engineer Judy Gimoto sang Champion Builders, iya ginpahayag nga may kapin 40 ka mga nagatrabaho sa lugar nga nangin kaupod man sang biktima.
Suno kay Gimoto, nag-agi sa insakto nga proseso ang mga trabahador antes nga nagtrabaho sa ila, sa diin, luyag man sini nga makuhaan sang statement ang kada isa agud makabulig sa imbestigasyon.
Nagapati man ang natungdan nga may foul play nga natabo kag isa ka inside job ang insidente bangud nagaisahanon lang man ang biktima sa kwarto sa ila barracks.
Ginpahayag man ni Gimoto nga posible ginsulod kag ginkawatan ang biktima antes nga ginpatay.
Nahibaluan nga may yara sang pilas nga tuga sang pagkabuno sa dughan kag butkon ang biktima kag may tabon sa nawong sang ini ang nasapwan sang iya kaupod sa trabaho.
Nagapati naman ang opisyal sang Brgy. Benedicto, Jaro, Iloilo City nga indi taga-ila lugar ang nagpatay sa foreman.
Sa interview sang Bombo Radyo kay Punong Barangay Abelardo Salting Jr., iya ginpahayag nga madamo sang nagatrabaho sa amo nga barracks kag indi tanan sa ila ang taga-Iloilo bangud may yara man sang mga taga-Negros.
Suno kay Salting, nakahibalo ang suspek nga nagaisahanon ang biktima sa iya kwarto kag posible nga nangin tsansa ini agud nga makapangawat.
Ginpahayag man sini nga masami ginakandado sang biktima ang iya kwarto, apang sang ulihi nakit-an, guba na ang kandado.
Gin-ako man sini nga may yara sang mga ‘akyat-bahay’ sa ila nga lugar nga nagapangawat sang kagamitan kag kwarta.
Apang gin-athag man sang punong barangay nga ang mga imbolbado sa iligal nga buluhaton ang nahatagan na sang leksyon kag naaresto na sang otoridad.
