Ginkumpirma sang Philippine Army nga naka-engkwentro sini ang pila ka mga myembro sang rebelde sa Barangay Cabatangan, Lambunao, Iloilo pasado ‘las kuatro kaina sang hapon.
Sa interview sang Bombo Radyo kay Lt. Col. J-Jay Javines, spokesperson sang 3rd Infantry Division, iya ginpahayag nga nakaatubang ang 82nd Infantry Division ang mga katapo sang Regional Headquarters (RHQ) kag Central Front, Komiteng Rehiyon-Panay (CF, KR-P).
Suno kay Javines, base sa inisyal nga report, naglawig sang dies minutos ang engkwentro apang wala pa sang dugang nga detalye kun pila ka rebelde ang yara sa lugar kag kun ano ang na-recover sang militar.
Natabo ang engkwentro samtang padayon ang pagpatrolya sang militar bangud man sa sunod-sunod nga engkwentro sang nagligad nga semana sa amo man nga barangay kag sa Barangay Aglonok, Calinog, Iloilo.
Suno kay Javines, wala sang napilasan sa tropa sang Philippine Army apang wala pa sang available nga impormasyon kun kamusta ang sitwasyon sa grupo sang mga rebelde.
BANGKAY SANG REBELDE
Samtang nagalibot ang mga tropa sang militar, nasapwan man ang bangkay sang isa ka lalaki nga yara na sa advanced state of decomposition.
Base sa reports, ginapatihan nga isa ini ka high-ranking leader sang Komiteng Rehiyon Panay apang gina-verify pa sang Army ang matuod gid nga identity sini.
Na-recover sang militar ang isa ka pusil.
Suno kay Javines, posible nga napilasan ini sa una nga engkwentro sa Calinog, nagpalagyo, apang napatay gid samtang yara sa kabukiran.
Nagpasalig man ang Philippine Army nga padayunon sini ang paglagas sa rebelde.
“Nagutom na sila, nakapoy na sila. Nakibon na naton sila sa babaw. Wala na sila sang pakadtuan. The momentum is on our side so dapat i-take advantage naton ini para maubos naton sila… unless mag-decide sila mag-surrender,” dugang ni Javines.
Matandaan nga sang damlag lang, lima man ka myembro sang NPA ang napatay sa asud-asud nga engkwentro sa Calinog kun sa diin amo man nga grupo ang naatubang sang militar.#
