Ginkamasaan sang England ang Iran, 6-2, sa opening Group B match sa FIFA World Cup 2022 sa Khalifa International Stadium.
Ang una nga nag-score sang goal para sa England amo ang 19-anyos nga si Jude Bellingham sa ika-35 nga minuto sang hampang. Ini ang una nga na-deliver ni Bellingham nga goal para sa pungsod kag una niya ini nga ginhimo sa World Cup stage.
Ang ikaduha nga goal ang nagikan kay Bukayo Saka sa 43rd minute. Kaangay ni Bellingham, ang tuig 2022 amo man ang World Cup debut ni Saka.
Ginsundan ni Raheem Sterling ang goal sa ika-45 nga minuto sang match.
Sa second half naman, nag-goal liwat si Saka apang tatlo ka minutos ang nakaligad, nakabawi ang Iran sa ika-65 nga minuto paagi sa goal halin sa Iranian star nga si Mehdi Taremi.
Wala nagpasugot ang England kag nagbawi liwat paagi kanday Marcus Rashford nga amo ang naghatag sang Goal Number 5 kag si Jack Grealish nga amo ang nagdul-ong sang Goal Number 6.
Sa katapusan nga minuto sang hampang, may foul nga natabo kag nagkadto ang penalty spot sa Iran. Nangin duha ang goals sang Iran matapos ang penalty kick nga halin gihapon kay Mehdi Taremi.
Talalupangdon naman nga wala naka-score ang team captain sang England nga si Harry Kane nga isa ka former Golden Boot award-winner kag top scorer sa 2018 World Cup.
Ginakabalak-an man ang mangin performance sini sa masunod nga hampang sang England batok sa USA matapos nga nakaangkon sang ankle injury.
Suno kay Bombo Ramil Isogon, international correspondent sa United Kingdom, antes pa man ang hampang, may yara na nga daan sang isyu sa ankle injuries ni Kane kag absent man ini sa lima ka separate occasions kag naka-miss sa 20 games para sa Spurs bangud sa problema sa iya nga buko-buko.
Sang nag-umpisa pa lang ang second half, nakit-an na ini nga nagauyat sa iya buko-buko apang nagpadayon sa paghampang matapos ang treatment. Pag-abot sang ika-76 nga minuto, ginpasulod na ang substitute.
Ginahulat subong sang English fans kun ano ang extent sang injury sang team captain sang Three Lions ilabi na bangud nakit-an ini nga nagakiang-kiang sang naguwa na sa Khalifa International Stadium.
Nahibaluan nga yara sa ika-lima nga pwesto ang England sa FIFA rankings, kag ika-20 naman ang Iran.
Nagpang-apat ang England sa 2018 World Cup kag nagalaum nga makakuha sang ila ikaduha nga FIFA title matapos ang ila iconic 1966 victory sa Wembley Stadium sa London.
