ILOILO CITY – Nadakpan ang tatlo ka personalidad sa magkatuhay nga anti-illegal drug operation sa Iloilo.
Nagalab-ot sa 21 ka sachet sang shabu ang nakuha nagikan sa subject sang buy bust operation sa Poblacion Centro, Calinog, Iloilo nga si Charles Joseph Daduya, 23, residente sang Poblacion Ilaya, Zarraga Iloilo.
Sa interview sang Bombo Radyo Iloilo, ginpahayag ni S/Insp. Kenneth Bermejo, hepe sang Calinog Municipal Police Station, ginpasungka na sadto si Daduya sa Zarraga PNP apang nakapalagyo kag nagpadulong sa banwa sang Calinog kun sa diin sini ginpadayon ang pagbaligya sang iligal nga droga.
Suno naman kay Daduya, sa Barangay Tanza, City Proper ini nagakuha sang supply sang iligal nga droga apang wala gintumod kun sin-o.
Samtang nadakpan naman ang English tutor kag isa pa ka personalidad sa ginpatigayon nga buy bust operation sa Barangay Huervana, La Paz, Iloilo City.
Ang mga naaresto amo sanday Roland Martin Paul Jacomili nga nagatudlo sang Ingles, kag Hilario dela Cruz.
Ginpahayag ni SPO2 Dante Sison nga sanday Jacomili kag Dela Cruz ang mga bag-uhanon nga pusher kag nagakuha sang supply sang iligal nga droga sa banwa sang San Miguel, Iloilo.
Apisar nadakpan, hugot naman ang pagpanginwala sang duha nga nagagamit ang mga ini kag nagabaligya sang iligal nga droga.