Ginpahayag ni Independent Commission on Infrastructure (ICI) adviser kag Baguio City Mayor Benjamin Magalong nga naghatag si anay Department of Public Works and Highways (DPWH) assistant district engineer Brice Hernandez sang testimoniya nga nagalakip sang impormasyon nga wala pa niya natuad sa mga congressional hearings may kaangtanan sa mga ghost kag substandard nga flood control projects nga nagabalor sang binilyon ka pesos.
Sa isa ka interview, ginbuyagyag ni Magalong nga magluwas sa isa ka salakyan, nagpasugot si Hernandez nga i-surrender ang iya mga personal nga propiedad, lakip na ang isa ka Ferrari, isa ka Lamborghini, kag pila ka mamahalon nga motorsiklo.
Matandaan nga sang Byernes, Setyembre 12, nagsugod na ang pormal nga imbestigasyon sang ICI upod ang mga myembro sini nga sanday anay DPWH Secretary Rogelio “Babes” Singson kag SGV Country Managing Partner Rossana Fajardo.
Nahibaluan nga nagpakita man personal si Hernandez sa komisyon agud magpahayag sang iya testimoniya.
Suno kay ICI Chairperson retired Justice Andres Reyes Jr., hilway, boluntaryo, kag wala sang pagduha-duha nga ginsabat ni Hernandez ang tanan nga palamangkutanon sang komisyon.
Ginpakita man sini ang iya bug-os nga kooperasyon sa ginapatigayon nga imbestigasyon.
Ginkumpirmar man ni Senate President Tito Sotto nga gindala halin sa Senate detention facility si Hernandez padulong sa ICI.
Ginapahanagutan siya nga maggawa agud magtipon sang resibo ukon pamatuod sang commission sa ginapahayag nga ma-anomaliya nga flood control projects.
