ILOILO CITY – Magapungko na bilang officer-in-charge sang Beautification Program ang department head sang City Environment and Natural Resources Office nga si Engineer Niel Ravena sa masunod nga semana.
Ini ang kasunod sang resignation sang executive assistant kag head sang Beautification Division nga si Ms. Ninda Atinado bangud sang isyu sang pagpang-ipit kag pagpautang sa mga job hires sa Iloilo City Hall.
Sa interview sang Bombo Radyo kay Engineer Ravena, iya ginpahayag nga nagasugod na subong nga semana ang ginahimo nga transition.
Kabahin sang transition amo ang inventory sa tawo kag logistics sa idalom sang Beautification Program kag isaylo sa pangalan ni Engr. Ravena kag sa opisina sang City Environment and Natural Resources Office.
Suno kay Engr. Ravena, gina-istorya niya ang mga natungdan nga indi dapat maapektuhan ang sweldo sang mga empleyado sa matabo nga transition sa idalom sang iya pangalan.
Dugang pa niya, indi man mangin mabudlay ang pag-uyat niya sa talatapan sang Beautification Division bangud naga-angot man ini sa obligasyon sang City Environment and Natural Resources Office sa subong.
Magluwas sini, si Ravena ang pinuno man sang General Services Office- Solid Waste Management Division kag Sanitary Landfill Operation.
Apisar sa tanan nga nga natabo, gindayaw sa gihapon ni Engr. Ravena ang nahimu nga improvement sa pagpamalakad ni Mrs. Atinado.
