Hugot nga ginpanindugan ni Engr. Roy Pacanan, ang OIC District Engineer sang Iloilo City District Engineering Office, nga wala nagkulang ang iya opisina sa pagpadala sang mga nagakaigo nga dokumento sa Iloilo City Government nahanungod sa ila nga mga proyekto.
Kabahin ini sang kaundan sang sabat ni Pacanan sa Memorandum nga ginpadala ni Engr. Sanny Boy Oropel natuhoy sa request ni Iloilo City Mayor Jerry P. Treñas nga supporting documents sang funding sources sang mga ongoing infrastructure projects sa idalom sang DPWH-ICDEO.
Sa amo nga response, gintumod ni Pacanan ang Facebook post ni Treñas tuhoy sa kakulang sang koordinasyon sang DPWH- ICDEO santo sa DPWH Department Order 110, s. of 2015.
Pahayag ni Pacanan, nagapadala gid ang ila opisina sang kopya sang Monthly Status Report humalin pa sang 2019.
Pamatuod diri suno sa iya amo ang pag-attach ni Mayor Treñas sang kopya sang Status Report of Projects, as of February 28, 2025 nga may petsa nga Marso 04, 2025 sa iya sulat nga ginpadala kay Secretary Bonoan.
Ginpahanumdom ni Pacanan kay Treñas nga bilang Local Chief Executive, mas maasyo kuntani nga mangin mahalong ini sa pag-post sang unverified information sa social media.
Ginkontra man sini ang pahayag sang alcalde nga willing ang syudad nga mag- extend sang assistance sa DPWH ICDEO.
Suno kay Pacanan, makapila ka beses na sila nagpadala sang rerquests para sa temporary road closure coordination meeting sa Office of the City Mayor kag iban nga related offices sang city government, apang suno kay Pacanan nga hungod ini nga gin-delay gan naapektuhan ang project implementation.
Ginhalimbawa pa sini ang isa ka Facebook post sang alkalde nga nagaalegar sang project delay sa Construction of Road sa Iznart St. kag JM Basa St. sang Drainage System.
Suno sa iya, nakontra na nila ang alegasyon sa ila sulat nga may petsa nga December 23, 2024 kun sa diin ginplastar nila nga ang matuod nga cause of delay amo ang kapaslawan sang city government nga ma- enact ang Regulation Ordinance No. 2024-195 sang temprano.
Sa pagkamatuod suno kay Pacanan, ang alkalde ang nagapa-delay sang mga proyekto bisan pa nga ginasiling sini nga handa siya nga buligan ang DPWH ICDEO.
Dugang ni Pacanan nga sulit-sulit na ang ginahaboy nga mga akusasyon ni Treñas kag indi niya pagpabay-an ini nga ginahimo sang alkalde.
Pahayag niya, dapat nga ma- address ni Treñas ang matuod ng isyu tuhoy sa non-completion sang 190 projects nga ginaimplementar sang City Government, kalakip ang construction sang Arevalo, La Paz, kag Jaro Big Markets, amo man ang Iloilo City Hospital.
Suno pa sa iya, indi pagtugutan sang iya opisina nga mabiktima sang pulitikal nga pagpanglimbong sang alkalde.
