ILOILO CITY – Katuyuan sang bag-o nga Executive Assistant for Power sang Iloilo City Government nga siguraduhon nga mahatag ang tanan nga kinahanglanon sang mga investors sa syudad sang Iloilo kun kuryente ang pagahambalan.
Sa interview sang Bombo Radyo kay Engr. Randy Pastolero, anay vice president for operations sang Panay Electric Company kag subong executive asst for Power, iya ginpahayag nga magluwas sa mga investors, katuyuan man niya nga tutukan ang pag pa-improve sa supply sang kuryente agud malikawan na ang madugay nga blackout sa syudad sang Iloilo.
Suno kay Pastolero, bentaha para sa iya nga mangin executive assistant for power bangud kilala na niya ang mga tawo sa likod sang mga electric distribution utility.
Dugang pa sang natungdan, may yara sang patigayunon nga pagsinapol kaupod ang Department of Energy agud malantaw kun pila pa ang pondo nga available nga magamit sa syudad para sa mga electricity projects.
