Gin-relieve na sa iya pwesto si Engr. Roy Pacanan bilang District Engineer sang Iloilo City District Engineering Office (ICDEO), ini ginkumpirma sa ginpatigayon nga 5th regular session sang Iloilo City Council kaina sang aga.
Nahibaluan nga nagapatigayon sang imbestigasyon ang Iloilo City Council sa mga flood control projects kag wala makatambong si Pacanan sa quad committee hearing sang lunes.
Sa interview sang Bombo Radyo kay Councilor Romel Duron, Asst. Majority Floor Leader, iya ginpahayag nga pila man ini ka beses nga wala nagsabat si Pacanan sa panawagan kag wala man nakapakita sa ginpatawag nga hearing sang Iloilo City Council.
Suno kay Duron, kabahin sang hearing sang Quad Committee ang handom sang konseho nga pamatian ang bahin ni Pacanan para mahatagan sang kasanagan ang mga isyu kag reklamo angot sa implementasyon sang proyekto batok sa pagbaha sa Iloilo.
Dugang pa niya, indi kuntani maglab-ot sa sini nga desisyon kon nagpakita sang kooperasyon si Pacanan.
Wala man kuntani problema kun willing lang siya makig-angot sa konseho, agud maistoryahan kag mabuligan sang insakto ang dapat nga lihok nga pagahimuon para sa syudad sang Iloilo.
