𝗜𝗟𝗢𝗜𝗟𝗢 𝗖𝗜𝗧𝗬 – Patigayunon na karon sa hapon ang engrande nga selebrasyon sang Chinese New Year sa Iloilo City.
Nahibaluan nga sang Enero 29 ang Chinese New Year, apang sa Iloilo City, magapatigayon sang selebrasyon ang Chinese community karon sa hapon sa Iloilo Freedom Grandstand.
Tema sang selebrasyon subong nga tuig sang Wooden Snake amo ang Providence: A Celebration of Grace, Gratitude, and Growth.
Sa interview sang Bombo Radyo kay Mr. Rito Carlos ‘Judgee’ Peña, Chairman sang Iloilo Festivals Foundation, Inc., iya ginpahayag nga balantayan ang Dragon Dance, kag Cultural Presentation.
Magluwas diri, madamo man sang mga manamit nga pagkaon sa food festival.
Kaangot sini, ginalauman ang moderate to heavy nga dalagan sang trapiko.
Sa interview sang Bombo Radyo kay Ret. Police Col. Uldarico Garbanzos, head sang Iloilo City Traffic Management Unit, iya ginpahayag nga may mga patigayunon nga road closure sa pila ka dalan sa downtown area sang syudad.
Ginaplano sang talatapan nga magsugod sirado sang dalan sa alas-12 sang udto agud makapreparar sa patigayunon nga Chinese New Year Parade sa alas-4 sang hapon sa Byernes.
Nag-abiso man ang natungdan nga kon naghalin sa ila assembly area sa Aldeguer Street, J. De leon St., Fermin Caram Street, IZNART Street (Filipino-Chinese Friendship Arc) pakadto sa JM Basa Street, magliko sa wala pakadto sa M. Peralta Street, pakadto sa Freedom Grandstand kag magliko sa tuo pakadto sa Ortiz, padulong sa Calasanz pakadto sa ila dispersal area.
Suno kay Garbanzos, nagalaum siya nga magasunod ang motorista sa pagsulundan agud nga indi na makatuga sang huol sa iban nga motorista.
