ILOILO CITY – Palawigon pa tubtob sa Abril 30, 11:59 sa gab-i, ang ginapatuman nga enhanced community quarantine sa syudad sang Iloilo.
Ini matapos nga nagsaka na sa 36 ang kaso sang coronavirus disease 2019 (COVID-19) sa Western Visayas sa diin apat ang nagikan sa syudad.
Sa mensahe ni Iloilo City Mayor Jerry Treñas, iya ginpahayag nga nakig-istorya na siya kay Iloilo Governor Arthur Defensor Jr., sa Department of Health (DOH), sa City Health Office, sa mga doktor, kag sa mga negosyante may kaangtanan sa amo nga lihok.
Matapos ang tatlo ka semana nga pagpatuman sang enhanced community quarantine, suno kay Treñas, luyag sang Iloilo City Government nga pasangkadon pa ang proteksyon sa mga pumuluyo ilabi na bangud ginkumpirma sang DOH nga may yara na sang local transmission sang COVID-19 sa syudad.
Kadungan sini, ginhingyo ni Treñas ang mga pumuluyo nga dumdumon ang mga simple nga pamaagi agud malikawan nga mabiktima sang nasambit nga virus.
Una, dapat nga magpabilin sa balay. Sa tion nga may importante nga baklon sa gwa, panugyan ni Treñas, isa lang ka miyembro sang pamilya ang dapat nga maglakat.
Ikaduha, dapat nga sundon ang social distancing measure sa tion nga yara sa pampubliko nga lugar kaangay sang bus, grocery store, ukon merkado.
Ikatatlo, dapat nga magsuksok sang face mask kag hand gloves.
Ikaapat, mas maayo kun magpaligo gid sa tion nga mag-abot sa balay.
Ikalima, dapat man nga i-disinfect ang groceries bangud posible man nga mangin carriers ang mga ini sang virus.
Ika-anum, dapat nga sundon ang curfew hours sa syudad — humalin ‘las otso sa gab-i tubtob ‘las singko sa aga.
Ika-pito, wala ginapahanugutan ang pagtipon-tipon ukon social gathering.
Ika-walo, dapat nga hugasan pirme ang kamot gamit ang habon kag tubig.
Ika-siyam, dapat nga pabaskugon ang immune system agud mabatuan ang posible nga infection.
Kag ika-pulo, dapat nga himuon nga oportunidad ang quarantine period agud mangin maayo nga pumuluyo sa syudad.
Suno kay Treñas, mas maayo kun magbulig sa otoridad paagi sa paghimo sang mga improvised nga Personal Protective Equipment (PPEs) kaangay sang face mask.
Mahimo man suno sa natungdan nga magbulig sa pag-raise sang pondo bilang bulig sa mga frontliners sa Iloilo.
