Ginpasalig sang Department of Justice (DOJ) nga pila ka semana na lang ang hulaton antes makumpleto ang environmental case nga i-file batok sa China bangud sa pagpanghalit sini sa West Philippine Sea.
Wala sang gin-mensyonar si Justice spokesperson Atty. Mico Clavano nga target date apang suno sa iya, ginakumpleto na lang ang attachments nga ebidensya kag ma-file ini sa bulig sang Solicitor General.
Una nga ginpahayag ni Justice Secretary Jesus Remulla ang plano nga pagpasaka sang kaso batok sa China sang Septyembre 2023 matapos nga ginkumpirma sang Armed Forces of the Philippines Western Command nga may mga kaso sang lapnagon nga coral harvesting sa Rozul (Iroquois) Reef.
Sunod sini ginpahayag nga posible ipasaka sang gobyerno ang kaso sa temprano nga bahin sang 2024.
May panawagan man si retired Supreme Court Associate Justice Antonio Carpio nga ilakip sa complaint ang damage nga yara sa Escoda Shoal.
Una na nga gin-akusaran sang Philippine Coast Guard ang China nga nagatukod sang artificial island sa Escoda Shoal bangud ginapatihan nga ang pagtampok sang mga corals malapit sa shoal ang kabahin na sang preparasyon para sa reclamation activities.
Sang 2013 matandaan nga ginhangkat sang Pilipinas ang legal basis sang China sa gina-claim sini sa West Philippine Sea paagi sa pagpasaka sang kaso sa Permanent Court of Arbitration sa The Hague, Netherlands. Pabor sa Pilipinas ang landmark ruling nga ginpaguwa sang 2016 kag gin-invalidate naman ang claims sang China, apang ini tanan ang wala man ginakilala sang Beijing.
