ILOILO CITY – Lauman nga mas magadamo na ang economic activities kadungan sang pagpatuman sang General Community Quarantine sa probinsya sang Iloilo, epektibo Mayo 16.
Ini matapos nga napirmahan na ni Iloilo Gov. Arthur Defensor Jr. ang Executive Order 118 may kaangtanan sa restrictions sa idalom sang General Community Quaratine.
Sa interview sang Bombo Radyo kay Defensor, iya ginpahayag nga ang sentro sang Executive Order amo nga amat-amat nga mabalik sa kinaandan ang sitwasyon.
Nalakip sa kaundan sang nasambit nga Executive Order amo ang mga masunod:
-Indi na kinahanglan ang quarantine pass sa syudad kag probinsya sang Iloilo apang wala gid sang problema kun may dala nga quarantine pass
-Mas makapaayo nga magdala sang Identification Card nga makapamatuod sang residency
-Valid sa gihapon ang Enhanced Community Quarantine pass magluwas lang kung gin-ilisan ini sang General Community Quarantine Pass
-Kinahanglanon ang quarantine pass ilabi na para sa mga residente sang iban nga probinsya sa Western Visayas nga magapadulong sa probinsya sang Iloilo
-Mga naga-edad sang 20 anyos panubo kag ang Senior Citizens ang ginadumili-an nga magbyahe
-Para sa mga Senior Citizen nga naga-isahanon sa pagpangabuhi nga kinahanglan magguwa sa balay agud nga mabakal sang kinahanglanon, kinahanglan nga magdala sang quarantine pass
-Epektibo sa gihapon ang Liquor ban kun sa diin magabukas ang essential business apang magapabilin nga sirado ang mga negosyo kun sa diin indi applicable ang social distancing measure
-Kanselado ang tanan nga mass gathering kag may yara sa gihapon sang border restrictions magluwas lang sa syudad sang Iloilo, Overseas Filipino Workers kag Local Strandees nga nakapakig-angot na sa Local Government Unit
-Kun municipality to municipality travel naman, mas makapaayo nga dal-on ang quarantine pass para malikawan ang huol
Magluwas diri, ginpahayag sang Gobernador nga wala sa iya sang problema ang kadamuon sang magabyahe nga pampubliko nga salakyan apang dapat nga ipatuman ang social distancing.
